Ushtarët të cilët ishin urdhëruar për të kapur presidentin turk Recep Tayyip Erdogan, gjatë përpjekjes së grusht-shtetit të dështuar në Turqi, kanë deklaruar se iu ishte thënë se “kishin për ta kapur një udhëheqës të rëndësishëm terrorist”, shkruan Agjencia shtetërore e vendit Anadolu.
Ushtarët e përfshirë në kapjen e presidentit turk ishin të informuar për detajet e grushtit të shtetit, dhe u dërguan në një hotel të qytetit turistik Marmaris, ku Erdogan dhe familja e tij po kalonin pushimet, gjatë tentativës për të marrë pushtetin nga ana e ushtrisë.
Është e paqartë se sa ushtarë kanë marrë pjesë në sulm, gjatë së cilit u vranë dy truprojat e Erdoganit.
Mbështetësit e Presidentit turk kanë festuar pas dorëzimit të ushtarëve puçistë në Urën e Bosforit.
