Sot është raportuar se deputetja e Lëvizjes Vetëvendosje, Adriana Matoshi, është e infektuar me COVID-19, e pavarësisht kësaj, ajo ka marrë pjesë në seancën për votimin e Presidentit, të premten dhe të shtunën.
Por, e kontaktuar nga Gazeta Express, Matoshi i ka mohuar këto pretendime. Ajo ka deklaruar se është e ftohur, por në testin për COVID-19, ajo ka rezultuar negative.
“Jo nuk është e vërtetë, ky lajm është duke qarkullu veç për me na bë dëm neve si parti politike. Është e vërtetë që unë jam e ftohur, e kam një koll, por kam rezultuar negativ”, ka deklaruar Matoshi.
Matoshi ka deklaruar se për këtë e posedon edhe dokumentin i cili vërteton se ajo është negative. Madje për këtë ka thënë se duhet pyetur edhe ushtruesen e detyrës së shefit të Grupit Parlamentar të Lëvizjes Vetëvendosje, Mimoza Kusari-Lilën.
“E kam dokumentin, për këtë mund të flisni me Mimoza Kusarin. Para Parlamentit, pasi veç është bërë shumë e madhe, keni me e pa edhe vetë se janë vetëm fjalë”, ka deklaruar Matoshi.
Express ka kontaktuar Kusari-Lilën, e cila ka deklaruar se deputetja Matoshi nuk është e infektuar me koronavirus.
“Nuk është e vërtetë, është e ftohur, e ka marrë rezultatin negativ. E kam dokumentin”, ka deklaruar Kusari-Lila.
