“Letër prej tri faqesh e gjysmë”: Natyra Kuçi tregon se Arlinda Zekaj iu drejtua Kryeprokurorit për ndihmë tri ditë para vr*sjes

Rreth tri ditë para se të vritej, e ndjera Arlinda Zekaj i kishte shkruar Kryeprokurorit të Shtetit një letër prej tri faqesh e gjysmë, në të cilën kishte përshkruar kronologjinë e ngjarjeve dhe kishte kërkuar ndihmë.

Kështu ka bërë të ditur Natyra Kuçi, e cila ka dhënë hollësi për përpjekjet e Arlindës për të siguruar mbrojtje nga institucionet shtetërore. Kuçi ka treguar gjithashtu se Arlinda Zekaj kishte qenë shoqja e saj.

Duke folur në emisionin “Debat Plus” në TV Dukagjini, Kuçi ka treguar se letra nuk është bërë publike dhe se ajo beson që dokumenti ndodhet te avokatja e viktimës.

“Linda, rreth tri ditë më parë, i ka shkruar një letër prej tri faqesh e gjysmë Kryeprokurorit të Shtetit, ku ka përshkruar të gjithë kronologjinë e ngjarjes dhe i ka kërkuar ndihmë. Letra nuk është publikuar. Unë nuk e kam. Besoj se e ka avokatja.”

Përveç letrës drejtuar Kryeprokurorit të Shtetit, Kuçi ka folur edhe për paraqitjet e vazhdueshme të Arlindës në polici, ku, sipas saj, kishte kërkuar ndihmë disa herë.

Ajo ka treguar se Arlinda kishte kaluar orë të tëra duke pritur në polici, me shpresën se paralajmërimet dhe shqetësimet e saj do të merreshin seriozisht nga autoritetet.

“Zinxhiri shtetëror ka pasur paralajmërime të vazhdueshme, por ato janë trajtuar në mënyrë joserioze. Ajo ka pritur edhe nga gjashtë orë në polici, duke shpresuar se dikush do ta merrte seriozisht. Kështu që të gjitha këto gjëra janë në telefona”, ka deklaruar Kuçi.

Kuçi shtoi më tej se Arlinda, pavarësisht përballjeve të vazhdueshme me institucionet, nuk kishte hequr dorë nga shpresa se situata do të zgjidhej.