Një ngjarje e rëndë ka ndodhur në qytetin e Adanës në Turqi, ku një oficer policie në pension dyshohet se ka vrarë djalin e tij.
Sipas mediave turke, ngjarja ndodhi rreth orës 11:30 në lagjen Gültepe të rrethit Sarıçam. Faruk Kayhan (52), ish-oficer policie, u përfshi në një debat me djalin e tij, Ahmet Kaan Kayhan (23), i cili dyshohej se kishte varësi nga droga.
Raportohet se konflikti shpërtheu pasi babai refuzoi t’i jepte para të birit. Gjatë përplasjes, Ahmet Kaan Kayhan dyshohet se e sulmoi të atin me thikë. Në këto rrethana, Faruk Kayhan nxori armën dhe qëlloi disa herë ndaj djalit të tij, duke e lënë të vdekur në vend.
Pas incidentit, 52-vjeçari telefonoi vetë policinë dhe qëndroi pranë trupit të të birit deri në mbërritjen e autoriteteve. Momente nga ngjarja u filmuan nga kalimtarë të rastit me telefonat e tyre celularë.
Në vendin e ngjarjes mbërritën ekipe të policisë dhe të urgjencës mjekësore, të cilat konstatuan vdekjen e 23-vjeçarit. Më pas, trupi i viktimës u dërgua në Institutin e Mjekësisë Ligjore në Adana për procedurat e mëtejshme.
