Mesfushori i Manchester Cityt, Yaya Toure ka kritikuar vendimin e FIFA-së për të shpërbërë task forcën e saj anti-racizëm.
Ajo ishte krijuar më 2013 por u shua të dielën nga FIFA që theksoi se e kishte arritur misionin e saj.
Sekretarja e përgjithshme e FIFA-së, Fatma Samba Diouf Samoura tha: “Ishte një mandat i veçantë, që u realizua i plotë”, përcjell “Zëri.info”.
Por, Toure nuk pajtohet me vendimin. “Kur kam marrë një letër që njoftonte se task forca e FIFA-së do të shuhet, mbeta shumë i dëshpëruar”, deklaroi Toure për faqen e tij personale.
“Letra lavdëronte punën e mirë të realizuar si rezultat i këshillave dhe rekomandimeve të task forcës. Por, si mund të ndalet diçka që është në fillim të punës? A është duke u treguar FIFA e përmbajtur para Kampionatit botëror në Rusi? Kjo nuk ka kuptim”, theksoi ai.
