Triumfi ndaj Diferdange në udhëtim me rezultat 1-0 dhe rrjedhimisht kualifikimi në Ligën e Konferencës i ka siguruar Dritës një hap të madh dhe historik duke treguar kështu ecurinë pozitive të futbollit kosovar.
Suksesi i skuadrës gjilanase ka bërë krenar gjithë sportdashësit dhe popullin e Kosovës të cilët kanë pasur reagime të shumta në rrjetet sociale duke shprehur krenarinë e tyre me suksesin e kampionit të Kosovës.
Ndjenja e krenarisë natyrisht se nis nga vet kryesia e klubit. Pas ndeshjes, i menjëhershëm ishte reagimi i presidentit Valon Murseli i cili tha se janë në krye të Dritës pikërisht për netë të tilla magjike.
“Për netë magjike evropiane si kjo e sonte jemi në krye të Dritës. Pas 9 viteve përpjekje e pritje, më në fund jemi në fazën e ligës në Ligën e Konferencës. Jam shumë i lumtur së bashku me Flamur Bunjakun që klubin tonë më në fund e kemi në një garë evropiane. Mundi, sakrifica e futbollistëve e stafit drejtues ndër vite u shpërblye”, ka shkruar ai.
I lumtur dhe krenar me Dritën u shpreh edhe presidenti i Federatës së Futbollit të Kosovës, Agim Ademi.
“FC Drita është kualifikuar në fazën e ligës në UEFA Conference League, një arritje kjo historike për klubin dhe një tjetër sukses i madh për futbollin e Kosovës në arenën evropiane. Kjo arritje dëshmon organizimin e shkëlqyer të klubit, shpirtin luftarak të futbollistëve dhe punën e palodhur të stafit në krye me trajnerin Zekirija Ramadani. Njëkohësisht, kjo është një dëshmi e rritjes së futbollit tonë dhe e një kampionati rivalizues e me plasman plotësisht meritor.”, ka shkruar Ademi.
Reagime pati edhe nga njohës të futbollit vendor, analistë e gazetarë të shumtë duke i dhënë kështu një jeho0në të merituar këtij suksesit të Dritës.
