Orët e ardhshme do të jenë vendimtare për ta kuptuar gjendjen e Cristiano Ronaldos.
Sipas mediave saudite, sulmuesi i Al Nassr do t’i nënshtrohet sot një rezonance magnetike për ta vlerësuar shkallën e problemit muskulor që e detyroi të largohej nga fusha në fund të ndeshjes së fituar kundër Al Fayhas, përcjell “Gazeta Express”.
Ylli portugez e ndjeu një shqetësim në bicepsin femoral dhe u zëvendësua në minutën e 81-të nga Abdullah Al-Hamdan.
Duket se shqetësimi është një lodhje muskulore, por vetëm ekzaminimet instrumentale do të sqarojnë se sa serioz është dëmtimi dhe do ta zbulojnë kohën e rikuperimit.
Pas ndeshjes, trajneri Jorge Jesus u përpoq të qetësonte tifozët e frikësuar.
“Ai kishte lodhje muskulore. Pas rezultatit 2-1, nuk desha të rrezikoja. Stafi ynë mjekësor do t’i bëjë të gjitha vlerësimet, por nuk mendoj se është diçka e rëndë.”
Trajneri e theksoi gjithashtu rëndësinë e lojtarëve që mund të ndikojnë në momentet kyçe, duke e përmendur paraqitjen vendimtare të João Félix.
Ndërkohë, kalendari i ndeshjeve e jep një pushim të detyruar.
Ndeshja e Kupës së Kampionëve Aziatike kundër Al Wasl të Rui Vitória, e planifikuar në Emiratet e Bashkuara Arabe, është shtyrë.
Vendimi erdhi nga AFC, e cila i ka pezulluar të gjitha ndeshjet e planifikuara në Lindjen e Mesme për arsye sigurie lidhur me tensionet gjeopolitike.
Ky shtyrje do t’ia lejojë Al Nassrit ta menaxhojë me kujdes më të madh gjendjen e liderit të tij – Ronaldo. /Gazeta Express
