Njerëzit në Florida janë paralajmëruar prej ditësh për uraganin Irma që pritej të godiste vendin dhe ashtu ndodhi.
Uragani ka sjellë erëra të forta dhe rritje të nivelit të detit, ndërsa njerëzit janë evakuuar nga autoritetet, qëndrojnë në streha banimi, janë larguar nga vendi ose kanë zgjedhur të qëndrojnë në shtëpi derisa makthi të marrë fund.
Një shqiptare në Amerikë na ka treguar situatën e rënduar nëpërmjet fotove dhe videove dërguar në redaksinë e Anabel. G.L, banuese në Dunedin, Florida shkruan se situata është alarmante, ndonëse janë në kushte më të mira se banorët e Naples.
“Zemra të del nga vendi, nuk e ke idenë. Është ora 2:09 e mëngjesit. Shumë errësirë. Janë vetëm dy rrugë kryesore që të nxjerrin nga këtu për në veri. Më mirë të qëndroj në dollap se të vdes në autostradë,” shkruan ajo e pyetur pse nuk zgjodhi të largohet. “Jemi në një zonë të bardhë, jo zonë evakuuimi. Nuk ka përmbytje, por tani që po të shkruaj është vetëm kategoria e parë, ndërsa shpejtësia e erës është 85 mph. Do të vazhdojë kështu edhe për tre orë të tjera.”
