Drejtori i Përgjithshëm i Shërbimit Korrektues të Kosovës, Sokol Zogaj, i tha Radios Evropa e Lirë, se zyrtarët e Shërbimit Korrektues tashmë janë në Prizren dhe po interesohen për sqarimin e rastit të vdekjes së veprimtarit të LVV-së, Astrit Dehari, në burgun e Prizrenit.
“Ende nuk është bërë obduksioni. Ende nuk kemi se çka të themi. Një ekip i shërbimit korrektues është atje. Ata dalin me një raport të veçantë. Sot kam drejtuar edhe një ekip tjetër që t’i hetojnë rrethanat”, tha shkurt zoti Zogaj.
Ndërkohë, Ministria e Drejtësisë, nëpërmjet një komunikate, deklaroi se me qëllim të, siç tha, garantimit të transparencës në hetimin e rastit, ka marrë vendim që t’ia mundësojë, ‘përfshirjen e ekspertit të kërkuar nga familjarët e të ndjerit Dehari, në cilësinë e vëzhguesit në procesin e autopsisë’.
Në anën tjetër, Kryetari i Lëvizjes Vetëvendosje, Visar Ymeri, në një konferencë të jashtëzakonshme që ka mbajtur sot ka thënë se vdekja e Astrit Deharit në burg është përgjegjësi e drejtëpërdrejtë e shtetit, transmeton zeri.info.
“Rast i kulluar i montimit politik .Ai ishte akuzuar për terrorizëm mirëpo terrorin po e bënë në fakt ky shtet. Shteti as nuk solli fakte por po i mbanë aktivistët në paraburgim. Vdekja e Astrit Deharit është përgjegjësi e drejtpërdrejtë e këtij shteti. Ai së bashku me shokët e tjerë janë terrorizuar tash e 68 ditë me akuza të pabaza”, ka thënë Ymeri, transmeton zeri.info.
Ai ka shtuar se mbështesin plotësisht kërkesën e familjes Dehari për autopsi të plotë të djalit të tyre.
Ndër të tjera Ymeri ka thënë se nuk do të ndalen deri në vënien e drejtësisë në vend.
“Mbështesim kërkesën e familjes Deharit për autopsi të pavarur për të parë shkaqet e vdekjes së Astritit. Ne nuk do të heshtim deri në zbardhjen e rastit dhe vënien e drejtësisë në vend”, ka shtuar lideri i Vetëvendosjes.
Në fund ai ka kërkuar lirimin e menjëhershëm të dy aktivistëve tjerë që kanë mbetur në paraburgim.
