Kryeministri Isa Mustafa ka shpërfillur vullnetin e Petrit Selimit, kur ka vendosur t’ia heqë nga dora procesin e menaxhimit të granteve qindramilionëshe që Kosova pritet t’i përfitojë nga agjencia shtetërore amerikane, Korporata Sfidat e Mijëvjeçarit (MCC).
Për ta mbajtur atë pozitë Selimi ishte i gatshëm të hiqte dorë nga posti i zëvendësministrit, shkruan sot Koha Ditore.
Më shumë se dy muaj më parë kreu i Qeverisë e pati emëruar Selimin si koordinator nacional në Zyrën për Sfidat e Mijëvjeçarit, e cila është përgjegjëse për këto grante.
Vendimi ia mundësonte që njëkohshëm të mbante edhe pozitën e numrit dy në Ministrinë e Punëve të Jashtme. Po kështu, edhe që të realizonte dy lloj të ardhurash nga buxheti i shtetit.
Por Agjencia Kundër Korrupsionit ka konstatuar se “këto dy funksione nuk mund të ushtrohen njëkohësisht për shkak se ekziston konflikt interesi”.
Megjithëse konstatimi është dhënë prej një muaji, në Qeveri tek të premten kanë ndërmarrë veprime për t’i ikur kësaj situate të kundërligjshme. Ekzekutivi e ka anuluar vendimin, me të cilin Selimi është emëruar koordinator. Dhe, përpos kësaj, ka ndryshuar edhe Rregulloren për strukturën organizative të Zyrës së Kryeministrit.
