SBASHK kërkon të zbritet mosha e pensionimit për mësimdhënës

Sindikata e Bashkuar e Arsimit, Shkencës dhe Kulturës (SBASHK) ka kërkuar që mësimdhënësit në moshën 60 vjeçare të pensionohen. Kërkesa përfshin rastet e mësimdhënësve që janë në gjendje të rëndë shëndetësore dhe po punojnë pa pasur mundësinë e pensionimit të parakohshëm. Kjo sindikatë ka njoftuar se kërkesa është emergjente të plotësohet, duke i bërë thirrje qeverisë që të zbatoj këtë kërkesë nëse vërtetë qëllimi është që të ketë cilësi në arsim, raporton Zëri.info

“Qeveritarët nuk kanë bërë asgjë për mësimdhënësit e sëmurë rënd. A mund të flitet për humanizëm të qeveritarëve lokalë e qendror kur ata nuk bëjnë asgjë për këta njerëz, që sa ishin shëndosh u munduan me tërë dijen të kontribuojnë për arsimimin dhe edukimin e brezave e tani me hapin e rënduar nga sëmundja shkojnë në shkollë se ndryshe do të mbesin pa bukën e gojës. Nuk janë shumë në numër këta njerëz dhe shteti me pak angazhime do të siguronte mjete e do t’i dërgonte në pushim të merituar duke ua siguruar një pension të dinjitetshëm”, thuhet në reagimin e sindikatës.

Rrahman Jasharaj kryetar i SBASHK-ut ka thënë në emër të sindikatës se disa për poenë politik e disa për të fituar edhe ndonjë projekt nga ndërkombëtarët, gjendjen në arsim e kanë paraqitur me ngjyrat më të zeza aq sa një pjesë e prindërve, sipas tij respektin e lartë që kishin ndaj mësuesit të fëmijëve të tyre kanë filluar ta zëvendësojnë me urrejtje.

“Subjektet politike që ishin në pushtet, qoftë në nivelin lokal apo qendror, arsimin e shpallnin prioritetet, por vazhdonin ta përdornin për të larë borxhin ndaj atyre që kishin vrapuar anë e kënd vendit për të siguruar vota duke i qerasur me pozita drejtorësh të shkollave”, ka thënë Jasharaj . Për ta ngritur cilësinë dhe për të qenë të gatshëm mësimdhënësit të ecin në hap me zhvillimet e hovshme teknologjike, ai thotë se shteti duhet ta ndërrojë qasjen ndaj arsimit dhe duhet përfillur kërkesa e SBASHK-ut që punëtorët e arsimit, siç shprehet Jasharaj “që janë të goditur nga sëmundje të rënda të lirohen nga procesi arsimor dhe t’u jepen pensione dinjitoze”.