Sipas Sky Sport Italia, Sassuolo është në prag të sigurimit të portierit të Ipswich Town, Arijanet Muric, në formë huazimi me pagesë dhe me opsion blerjeje për mbi 10 milionë euro.
Kjo do të ishte një investim i madh për Neroverdët, të cilët fituan titullin në Serie B sezonin e kaluar, duke siguruar rikthimin në elitën e futbollit italian.
Kostoja e operacionit do të ishte mbi 10 milionë euro në total, duke përfshirë huazimin me pagesë dhe opsionin e blerjes në fund të sezonit.
Muric, një dështim te Ipswich Town
Shuma e lartë është befasuese duke marrë parasysh se Muric bëri një sërë gabimesh dhe humbi vendin si titullar, duke u konsideruar një dështim.
Ai mbajti vetëm një portë të paprekur në 28 paraqitje në Premier League, duke pësuar 49 gola.
Portieri 26-vjeçar ka lindur dhe është rritur në Zvicër, por përfaqëson Kosovën në nivel ndërkombëtar.
Karriera e tij më parë ka përfshirë klubet Manchester City, NAC Breda, Nottingham Forest, Girona, Willem II, Adana Demirspor dhe Burnley, përpara se të shitej te Ipswich Town verën e kaluar për 9.55 milionë euro.
Aktualisht, portieri i parë i Sassuolos është Giacomo Satalino, ndërsa Stefano Turati është rikthyer nga huazimi te Monza. /GazetaExpress/
