Pas marrëveshjes së arritur me LDK-në për zgjedhjet e parakohshme të 7 qershorit, Osmani u rikthye në shtëpinë e saj të vjetër politike – duke udhëhequr listën zgjedhore të LDK-së.
Marrëveshja me kryetarin e LDK-së, Lumir Abdixhiku, u paraqit nga të dyja palët si një përpjekje për bashkimin e spektrit politik që dikur përfaqësonte Osmani, pas viteve të ndarjes së saj me këtë subjekt, raporton lajmi.net
Ndonëse synimi i saj mbetet sigurimi i një mandati të dytë në postin e presidentes, Vjosa Osmani tashmë ka siguruar votat e mjaftueshme për t’u bërë pjesë e Kuvendit të Kosovës si deputete nga radhët e LDK-së.
Pikërisht ky rikthim i mundshëm në një funksion tjetër publik ka ngritur edhe dilema lidhur me beneficionet që i takojnë pas përfundimit të mandatit presidencial. Në këtë rast, shtrohet pyetja nëse Osmani mund të vazhdojë të përfitojë të drejtat financiare të parapara për ish-presidentët, nëse njëkohësisht ushtron mandatin e deputetes në Kuvendin e Kosovës.
A e ruan Vjosa Osmani të drejtën për përfitimet financiare që parashihen për ish-presidentët tashmë si deputet e zgjedhur apo merr një post tjetër shtetëror?
Për këtë temë ka folur njohësi i çështjeve juridike, avokati kosovar, Ardian Bajraktari, në një prononcim për Lajmi.net, ai theksoi se përfitimet financiare të ish-presidentëve nuk duhet të interpretohen si mundësi për përfitim të dyfishtë nga fondet publike, duke iu referuar edhe praktikave të deritanishme institucionale në raste të ngjashme.
“Presidenti i Republikës së Kosovës, pas përfundimit të mandatit të rregullt, gëzon të drejta dhe beneficione të përcaktuara me ligj. Këto përfshijnë edhe përfitimin financiar, përkatësisht pensionin në shumën prej 70% e pagës të cilën e merr Presidenti i Republikës së Kosovës. Mirëpo, këto të drejta veçmas përfitimet financiare, nuk duhet parë si mundësi për të përfituar njëkohësisht nga dy burime publike financimi, bazuar edhe në praktiken e deritashme institucionale për raste të tilla”, tha Bajraktari për Lajmi.net.
Ai shtoi se në rast se një ish-president zgjidhet ose emërohet në një detyrë tjetër publike, atëherë shtrohet çështja e papajtueshmërisë së përfitimeve financiare që rrjedhin nga dy funksione të ndryshme të financuara nga shteti.
“Prandaj, nëse një ish-President zgjedhet apo emërohet në një funksion tjetër publik, siç është mandati i deputetit, atëherë lind çështja e papajtueshmërisë së përfitimeve, dhe ai/ajo duhet të zgjedhë cilin nga kompensimet do t’i përfitoi, sepse nuk mund të ketë në të njëjtën kohë pagën për funksionin e ri publik dhe përfitimin financiar të ish-Presidentit”, u shpreh ai.
Zgjedhjet e parakohshme të 7 qershorit u mbajtën pasi legjislatura paraprake dështoi të votonte një president të ri brenda afatit kushtetues, pasi Vjosa Osmanit i skadoi mandati pesëvjeçar në prill.
Për çështjen e presidentit kërkohen të paktën 80 vota – apo dy e treta e deputetëve – në dy rundet e para të votimit, dhe presidenti i ri do të mund të zgjidhej me 61 vota në rundin e tretë./Lajmi.net/
