Përzgjedhësi i ri i Shqipërisë, Edy Reja, zbulon listën. Shqipëria me 13 futbollistë kosovarë kundër Islandës dhe Moldavisë në kualifikimet për “Euro 2020”.
Përzgjedhësi i Kombëtares së Shqipërisë, Edy Reja, e ka zbuluar listën e futbollistëve të ftuar për dy ndeshjet e radhës kualifikuese për “Euro 2020” që kuqezinjtë do t’i zhvillojnë ndaj Islandës dhe Moldavisë.
Sikurse paraardhësit e tij, edhe trajneri i ri italian i kuqezinjve me të filluar punën në Shqipëri ka treguar se do të llogarisë shumë te futbollistët kosovarë, raporton Gazeta Express.
Prej 29 lojtarëve të ftuar, 13 prej tyre janë nga Kosova. Fjala është për Etrit Berishën, Ardian Ismajlin, Arlind Ajetin, Frederik Veselin, Egzon Binakun, Kastriot Dermakun, Mërgim Mavrajn, Amir Abrashin, Migjen Bashën, Taulant Xhakën, Ylber Ramadanin, Ermir Lenjanin dhe Eros Grezdën.
Reja i ka kthyer në Kombëtare disa futbollistë, por nuk mungojnë as surprizat nga ai, siç është rasti i Berat Gjimshitit, i cili është lënë, ndërsa ftesë nga italiani ka marrë talenti 19-vjeç, Marash Kumbulla, i cili luan në Verona.
Shqipëria më 8 qershor do ta vizitoi Islandën në kampanjën kualifikuese për Euro 2020, kurse tri ditë më vonë e pret Moldavinë. /GazetaExpress/
