Real Madrid po përgatit lëvizje ambicioze në merkaton verore, me dy emra të mëdhenj që kanë hyrë në radarët e klubit madrilen: Joao Neves dhe Alessandro Bastoni.
Sipas raportimeve nga “Partidazo COPE”, presidenti i Real Madridit, Florentino Perez, është një admirues i madh i mesfushorit të Paris Saint-Germain dhe mbrojtësit të Inter Milan.
“Los Blancos” po shqyrtojnë mundësinë e realizimit të të dy transferimeve, teksa klubi kërkon të përforcojë ndjeshëm skuadrën pas një tjetër sezoni zhgënjyes. Drejtuesit madrilenë besohet se duan të ndërtojnë një ekip edhe më konkurrues për sezonin e ardhshëm dhe i shohin Nevesin dhe Bastonin si profile ideale për projektin e ri.
João Neves konsiderohet si një nga talentet më premtues të futbollit evropian në mesfushë, ndërsa Bastoni ka qenë një nga shtyllat kryesore të mbrojtjes së Interit në vitet e fundit, falë sigurisë dhe cilësisë së tij në ndërtimin e lojës nga prapa.
Megjithatë, transferimi i tyre nuk pritet të jetë i lehtë, pasi si PSG ashtu edhe Interi nuk kanë ndërmend të heqin dorë lehtë nga dy yjet e tyre. Pavarësisht kësaj, Real Madridi duket i vendosur të tentojë goditje të mëdha në merkato për të rikthyer dominimin në futbollin evropian.
