Dinamo i Ferizajt, i cili pak ditë para ndeshjes e ndërroi trajnerin, e ka siguruar finalen e barazhit për inkuadrim në Superligën e Kosovës.
Skuadra e drejtuar tashmë nga Burim Qerkini, e ka mposhtur Lirinë e Ismet Munishit në gjysmëfinalen e barazhit, e cila u luajt në stadiumin “18 Qershori” në Klinë, mes vendit të tretë dhe të katërt në tabelën e Ligës së Parë.
Dinamo fitoi 2-0, me dy golat e shënuar në pjesën e dytë të ndeshjes, pasi pjesa e parë përfundoi pa gola dhe me pak raste.
Ishte Daniel Tetteh që shënoi për 1-0, në minutën e 62-të, pas një hutie në mbrojtjen e Lirisë.
Kur Liria nisi të shpeshtojë sulmet, Dinamo e gjeti edhe golin e dytë.
Në minutën e 80-të, Ardian Shaljani shënoi për 2-0, pasi u gjet më së miri në zonë, nga një top që po vinte pak më larg se vija e 16-shit.
Me këtë fitore, skuadra e Qerkinit e ka siguruar kualifikimin në finalen e barazhit për inkuadrim në Superligën e Kosovës, ku do të luajë ndaj vendit të tetë të Superligës së Kosovës.
Momentalisht ky vend i përket Llapit, me një xhiro nga fundi i Superligës së Kosovës.
Ndeshja finale e barazhit të Superligës së Kosovës do të zhvillohet më 6 qershor./GazetaExpress/
