Qytetarët e Kosovës nga 1 janari i vitit 2017 janë të obliguar të paguajnë sigurimet shëndetësore. Vendimin për këtë e ka sjellë Qeveria e Kosovës, shkruan sot Koha Ditore.
Por, është vetë ajo që nuk e ka përcaktuar ende datën se kur kontribuuesit në Fondin e Sigurimeve Shëndetësore mund t’i gëzojnë shërbimet.
Krijimi i sistemit informativ shëndetësor, hartimi i listës së shërbimeve bazike, miratimi i akteve nënligjore dhe krijimi i një liste të çmimeve të shërbimeve, janë disa nga veprimet paraprake që do të duhej të ndërmerreshin dhe pa të cilat nuk mund të nisë zbatimi i Ligjit për sigurimet shëndetësore. Shumica prej tyre nuk janë gati dhe rrjedhimisht zbatimi konsiderohet i jashtëligjshëm nga disa institucione.
