Kryeministri Edi Rama ka reaguar ndaj kritikave për mungesën e avionëve zjarrfikës në Shqipëri, në një kohë kur vendi po përballet me një situatë të vështirë nga zjarret.
Në një postim në rrjetet sociale, ai tha se pyetja më e shpeshtë që i drejtohet këto ditë është: “Pse nuk blen Shqipëria avionë zjarrfikës?”, por sipas tij, situata është më e ndërlikuar.
“Ka shpërthyer një debat pse nuk blen Shqipëria avionë zjarrfikës, ndërkohë që ka ca llogari që duhen bërë dhe zjarret e ditëve të fundit nuk janë assesi çështje e një apo dy apo edhe tre avionësh! Dakord, mirë do ishte t’i kishim, por…”, u shpreh Rama.
Ai solli si shembull Greqinë, e cila sipas tij, ndonëse ka një flotë të madhe zjarrfikëse, po përballet me situata edhe më të rënda. “Greqia ka një flotë ajrore totale prej 77 avionësh zjarrfikës; helikopterë janë pakashumë 20; automjete të tjera afërsisht 3 mijë e 500 dhe zjarrfikëse të të gjitha llojeve e funksioneve. Pra, e thënë thjeshtë.”
Kryeministri shtoi se Shqipëria këtë vit ka më shumë mjete ajrore në operacion se kurrë më parë, përfshirë ndihmën nga Emiratet e Bashkuara dhe Mekanizmi Europian i Emergjencave.
Në përfundim, ai theksoi se menaxhimi i situatave kërkon fokus te shkaqet, jo vetëm reagime ndaj pasojave: “Sa më shumë aq më mirë padiskutim, por prapëseprapë kurimi i pasojave nuk i eliminon shkaqet… dhe janë shumë më komplekse se sa duken kur numëron avionët.”
