Lëvizja Vetëvendosje nuk i ka votat për shumicë parlamentare, kjo është dëshmuar 24 herë – kaq ka dështuar Albulena Haxhiu të zgjidhet kryetare e Kuvendit të Kosovës.
Në tryezë, kryesish të kafeneve në Prishtinë, ka pasur takime në mes kryetarit të Lëvizjes Vetëvendosje Albin Kurti e atij të NISMA Socialdemokrate, Fatmir Limaj.
Të dytë udhëheqin subjekte socialdemokrate, gjë për të cilën Kurti gjatë një interviste në RTK më 20 maj, e cila gjerësisht në opinion u konsiderua si “intervistë ledhatuese”, Kurti tha se “VV dhe NISMA do duheshin të ishin parti simotra”.
Aty, Kurti kishte thënë se “nuk mund ta pranojnë Fatmir Limajn si kryeparlamentar për faktin se ka vetëm tre deputetë”.
Por, si një argument shtesë, ai përmendi dy partitë e koalicionit, GUXO e Alternativa që bashkë numërojnë 7 nga 48 deputetë sa ka në total Lëvizja Vetëvendosje në Kuvend – rezultat i dalë nga zgjedhjet e 9 shkurtit.
“Tash unë jam në koalicion me partinë Guxo dhe Alternativa, partia Guxo i ka 6 deputetë, dhe tash një parti me 3 deputetë, të ja jap kryeparlamentarin kur e kam koalicion me një parti që e ka dyfishin, kjo e dëmton pariparueshëm arkitekturën e marrëveshjes paraprake që ka VV me partinë Guxo dhe Alternativa, pra nuk ishte gjë e mundur”, ka thënë Kurti.
Vetë Fatmir Limaj gjatë një interviste në “Pressing” të T7, më 26 maj, kishte thënë se “ka kërkuar nga Kurti bashkëpunim në nivel Kuvendi”.
“Nisma nuk është e interesuar të jetë pjesë e Qeverisë”, kishte thën Limaj – duke pranuar se diskutim ka qenë pozita e kryeparlamentarit.
“Frika e Kurtit”, nga partnerët e koalicionit është racionale, bazuar në deklarimet publike që janë bërë nga Donika Gërvalla e Mimoza Kusari-Lila, kryetare të Guxo respektivisht Alternativa.
Donika Gërvalla, kundërshtoi idenë që Fatmir Limaj të zgjidhet kryetar i Kuvendit, duke theksuar se një parti me vetëm tre deputetë nuk mund të pretendojë për pozicionin e dytë më të lartë në shtet – duke i dhënë kuptim asaj që tha Kurti, që nënkupton “frikë e brendshme për humbje mandatesh”.
Edhe Mimoza Kusari-Lila, më 1 qershor ka shkruar në Facebook për pozicionin e Lëvizjes Vetëvendosje që të vazhdojë të kandidojë Albulena Haxhiun për kryeparlamtare.
Të hënën kjo do të ndodh për herën e 25.
Teksa, Kurti ka provuar marrëveshje me Limajn, gjë që nuk ka ndodhur – tashmë i është kthyer kritikave ndaj opozitës për “bllokim të Kuvendit”, përkundër se negociatat e tija me Limajn dolën të pasuksesshme.
