Në ndjekje të shembujve në Europë apo më tutje, shumë prej klubeve turke, posaçërisht ato të futbollit, patën nisur t’i quanin terrenet e tyre sportive me emërtimin “arena”.
Një risi e pritur jo mirë nga presidenti i vendit, që dy ditë më parë ka bërë të ditur se e ka udhëzuar ministrin për sportet që të urdhërojë heqjen e fjalës “arena” nga të gjitha emërtimet e terreneve sportive në Turqi.
Ky vendim ka të bëjë si me përpjekjen për ruajtjen e gjuhës turke, po ashtu dhe me domethënien negative të fjalës “arena”.
“Unë jam kundër ‘arenave’,” do të thoshte presidenti turk. “Nuk ka diçka të tillë në gjuhën tonë. Hidhini një sy përkufizimit; nuk mund të ketë diçka të tillë.”
Klubi i parë që ka vendosur ta ndryshojë një emërtim të tillë është Gallatasaraji. “Türk Telekom Arena” është vendosur të zëvendësohet me “Stadiumi Türk Telekom”.
E njëjta gjë do të ngjasë me terrenin e ri futbollistik të Beshiktashit, që nga “Vodafone Arena” do të bëhet “Stadiumi Vodafone”. /tesheshi.com/
