Ambasadori i Francës në Kosovë, Olivier Guerot, ka komentuar publikisht vendimin e Komisionit Qendror të Zgjedhjeve për të moscertifikuar kandidatët e Listës Serbe, duke e cilësuar atë si një hap që rrezikon besueshmërinë e procesit zgjedhor.
Përmes një reagimi në platformën “X”, diplomati francez shprehu qartë shqetësimin e tij për mënyrën se si po zhvillohen procedurat zgjedhore, transmeton lajmi.net.
Sipas Guerot, një vendim i tillë nuk i shërben klimës së nevojshme demokratike dhe mund të ndikojë negativisht në perceptimin e përgjithshëm për zgjedhjet e ardhshme.
Ai theksoi se institucionet duhet të sigurojnë kushte të barabarta dhe të hapura për të gjithë pjesëmarrësit politikë.
“Vendimi i marrë dje nga KQZ-ja në lidhje me kandidatët për zgjedhjet e ardhshme është zhgënjyes dhe i diskutueshem. Nuk po kontribuon në zgjedhje transparente dhe gjithëpërfshirëse”, ka shkruar ambasadori./lajmi.net/
