Pos mashtrimit me listat e veteranëve, ka nisur edhe një formë tjetër e keqpërdorimit me këtë status. Janë disa raste, të falsifikimit të certifikatës së veteranit të luftës përmes së cilit disa persona po marrin pensionin.
Kështu po dyshon Prokuroria e Prishtinës, e cila ka ngritur aktakuzë për katër persona për kryerjen e veprës penale “Falsifikim të Dokumenteve”.
T7 ka siguruar dy aktakuzat e ngritura nga Prokuroria.
Sipas Prokurorisë të akuzuarit me inicialet F.G, H.SH dhe P.G kanë vepruar me dashje dhe duke qenë të vetëdijshëm se po vepronin në mënyrë të kundërligjshme.
Rastet i kishin lajmëruar në polici punëtorët e zyrës së veteranëve në Qeverinë e Kosovës, pasi e kishin vërejtur se ishin falsifikuar në tersi.
E i akuzuari P.G në deklaratën e dhënë në Prokurori tregon se si ishte mashtruar nga F.G se do ia siguronte statusin e veteranit.
Ndërkaq i akuzuari F.G e mohon se është i përfshirë në falsifikimin e dokumenteve për veteran të rremë.
Falsifikim të dokumentit kishte bërë edhe S.M. ndaj të cilët është ngritur aktakuzë për falsifikim të dokumenteve për ta përfituar statusin e invalidit të luftës së UÇK’së.
Me këtë sipas prokurorisë S.M. kishte kryer veprën penale të mashtrimit.
E sipas kryeprokurorit të Prishtinës, Imer Beka, këto nuk janë rastet e vetme pasi janë duke hetuar edhe disa raste të tjera të përfitueseve të statut të veteranit.
Se ka raste të tilla të falsifikimit të dokumenteve e pohoi edhe kryetari i Organizatës së Veteranëve të Luftës së UÇK’ë Hysni Gucati ditë më parë në emisionin Frontal.
Ndërkohë Prokuroria Speciale e Kosovës ka ngritur aktakuzë ndaj ish-krerëve të Komisionit Qeveritar për Njohjen dhe Verifikimin e Statusit të Veteranëve për “Keqpërdorim të pozitës ose autoritetit zyrtar, që ndërlidhen me fryrjen e listave të veteranëve të Ushtrisë Çlirimtare të Kosovës.
