Natasha Kandiq: Ministrja Paunoviq e di çfarë ndodhi në Pejë, por relativizon krimet
Aktivistja serbe për të drejtat e njeriut, Natasha Kandiq, ka reaguar ndaj deklaratave të ministres serbe, Snezhana Paunoviq, duke e akuzuar atë se është në dijeni të krimeve të kryera gjatë luftës në Kosovë, por megjithatë i relativizon ato përmes deklaratave të saj publike.
Kandiq ka rikujtuar se Paunoviq është e lindur në Pejë dhe se e di mirë se më 27 mars 1999 policia serbe dëboi pothuajse të gjithë popullsinë shqiptare nga qyteti.
Sipas saj, shqiptarët u detyruan të largoheshin në kolona, në këmbë drejt Malit të Zi, ndërsa shumë të tjerë u deportuan me autobusë drejt Shqipërisë.
“Ministrja Paunoviq është nga Peja. Ajo e di mirë se më 27 mars 1999 policia serbe dëboi nga Peja pothuajse të gjithë popullsinë shqiptare – se njerëzit largoheshin në këmbë, në kolona drejt Malit të Zi, ndërsa me autobusë deportoheshin në Shqipëri”, ka deklaruar Kandiq.
Ajo ka përmendur gjithashtu krimet e kryera në fshatrat Çyshk, Pavlan, Zahaq dhe Lubeniq, ku, sipas saj, civilët u vranë dhe më pas trupat e tyre u dogjën.
Sipas Kandiqit, pavarësisht njohurive për këto ngjarje, Paunoviq po e paraqet publikisht spastrimin etnik si një zgjidhje të dëshirueshme politike dhe shpreh keqardhje që ai nuk ishte zbatuar në vitin 1998.
Lexo edheGrupi BALFIN dhe IFC forcojnë partneritetin strategjik për zhvillimin e shërbimeve financiare digjitale
“Ajo i di të gjitha këto, por pavarësisht kësaj, e paraqet publikisht spastrimin etnik si një zgjidhje të dëshirueshme politike dhe shpreh keqardhje që nuk ishte zbatuar në vitin 1998”, ka shtuar ajo.
Në përfundim, Kandiq ka theksuar se deklaratat e ministres serbe nuk duhet të interpretohen vetëm si qëndrime për ngjarjet e së kaluarës, por si një tregues se ideologjia që, sipas saj, çoi në spastrimin etnik gjatë luftës në Kosovë vazhdon të jetë e pranishme.
“Fjalët e saj nuk i përjetoj si një diskutim për të kaluarën, por si një mesazh se ajo ideologji nuk është braktisur”, ka përfunduar Kandiq.
