Kampioni në fuqi, Napoli e zgjati serinë e tyre pa fitore me një humbje befasuese 2-0 ndaj Bolognas, ku Thijs Dallinga dhe Jhon Lucumi ishin vendimtarë.
“Partenopejt” vinin nga dy barazime radhazi pa gola kundër Comos dhe Eintracht Frankfurtit, ndërsa dëmtimet e Kevin De Bruyne, Leonardo Spinazzola, Billy Gilmour, Alex Meret dhe Romelu Lukaku kishin ndikuar dukshëm.
Megjithatë, ata ishin ende një pikë përpara në krye të tabelës. Nga ana tjetër, “Rossoblu” kishin luajtur 0-0 me SK Brann në Ligën e Europës të enjten, edhe pse kishin mbetur me 10 lojtarë për më shumë se një orë.
Remo Freuler do të mungojë për dy muaj për shkak të një frakture në klavikulë, duke iu bashkuar Nicola Ravaglias dhe Ciro Immobiles në listën e të dëmtuarve.
Fillimi ishte më i keqi i mundshëm për Bolognan, pasi portieri Lukasz Skorupski u dëmtua gjatë një goditjeje nga porta.
Me Ravaglian gjithashtu jashtë, trajneri iu desh t’i jepte debutimin në Serie A 17-vjeçarit Massimo Pessina.
Bologna kaloi në avantazh kur zëvendësuesi Nicolò Cambiaghi depërtoi nga e majta dhe dërgoi një top pas vijës fundore për Dallingan, i cili i shpëtoi markimit të Amir Rrahmanit dhe shënoi nga gjashtë metra pranë shtyllës së parë.
Bologna dyfishoi epërsinë, pasi Emil Holm dërgoi një krosim nga e djathta pas një goditjeje dënimi dhe gjeti Lucumin, i cili shënoi me kokë nga gjashtë metra — goli i tij i parë ndonjëherë në Serie A.
Pas kësaj humbjeje, Napoli mbetet në pozitën e dytë, me pikë të barabarta me Milanin, i cili është i pari.
Interi ka mundësinë që sonte të dalë i pari, me fitore ndaj Lazios, ndeshje që luhet nga ora 20:45.
Bologna, ndërkohë është e pesta me 21 pikë./GazetaExpress/
