Ministria e Punëve të Jashtme dhe Diasporës e Republikës së Kosovës ka reaguar ashpër ndaj arrestimit të qytetarit kosovar Behar Preniqi, i cili u ndalua një ditë më parë nga autoritetet serbe në pikën kufitare Batrovci, mes Kroacisë dhe Serbisë.
Rasti ka ngjallur reagime të forta publike, duke u konsideruar si pjesë e një fushate të qëllimshme të arrestimeve politike, që po prek gjithnjë e më shumë qytetarë të Kosovës, transmeton lajmi.net
MPJD ka bërë të ditur se Zyra Ndërlidhëse e Kosovës në Serbi është angazhuar menjëherë përmes kanaleve zyrtare për të siguruar informacione të sakta për ndalimin e Preniqit dhe ka adresuar një kërkesë zyrtare te autoritetet serbe për të sqaruar arsyet e arrestimit. Rasti është përcjellë gjithashtu edhe te Delegacioni i BE-së në Serbi dhe te misionet diplomatike të vendeve të Quint-it.
Sipas ministrisë, arrestimi i Preniqit është vetëm një nga rastet e fundit që dëshmon praktikat destruktive dhe represive të Serbisë ndaj qytetarëve të Kosovës, me pretendime të paprovuara se ata kanë qenë pjesëtarë të UÇK-së. Këto veprime, thuhet në reagim, bien ndesh me të drejtën ndërkombëtare dhe me konventat për të drejtat e njeriut.
Në fund, MPJD u bën thirrje qytetarëve të Kosovës që të shmangin udhëtimet përmes territorit të Serbisë, ndërsa i kërkon bashkësisë ndërkombëtare të reagojë me vendosmëri ndaj këtyre praktikave që cenojnë lirinë dhe sigurinë e qytetarëve të Kosovës.
Reagimi i plotë i MPJD-së:
Ministria e Punëve të Jashtme dhe Diasporës e Republikës së Kosovës shpreh shqetësimin e thellë lidhur me intensifikimin e rasteve të arrestimeve arbitrare dhe të paprovokuara të qytetarëve të Republikës së Kosovës nga autoritetet e Serbisë
Rasti i fundit i arrestimit të qytetarit Behar Preniqi, i cili u ndalua dje në pikën kufitare Batrovci, në kufirin ndërmjet Kroacisë dhe Serbisë, përbën një tjetër dëshmi të qartë të praktikave të papranueshme dhe destruktive të autoriteteve serbe, të cilat bien në kundërshtim të hapur me të drejtën ndërkombëtare dhe me standardet themelore për mbrojtjen e të drejtave të njeriut.
MPJD konfirmon se Zyra Ndërlidhëse e Republikës së Kosovës në Serbi, menjëherë pas kontaktit me familjen e z. Preniqi, është angazhuar përmes kanaleve diplomatike dhe zyrtare për të siguruar informacione të sakta dhe të plota lidhur me këtë rast.
Zyra Ndërlidhëse ka adresuar një kërkesë zyrtare autoriteteve të Qeverisë së Serbisë për të konfirmuar arrestimin e z. Preniqi dhe për të sqaruar arsyet e ndalimit të tij. Përveç kësaj, rasti është përcjellë edhe te Delegacioni i Bashkimit Evropian në Serbi si dhe te misionet diplomatike të vendeve të Quint-it.
Në rast se ndaj z. Preniqi vendoset masa e paraburgimit dhe iniciohet procedurë penale, Zyra Ndërlidhëse do të ndërmarrë hapat e nevojshëm për të kërkuar një vizitë zyrtare në vendin e ndalimit të tij.
Në këtë fazë, MPJD u bën thirrje përsëri të gjithë qytetarëve të Republikës së Kosovës që të shmangin udhëtimet përmes territorit të Serbisë, për të garantuar sigurinë dhe mirëqenien e tyre.
I bëjmë thirrje Bashkësisë Ndërkombëtare që të reagojë zëshëm dhe me vendosmëri ndaj praktikave represive të Serbisë, të cilat janë në kundërshtim me parimet themelore të të drejtës ndërkombëtare dhe me konventat ndërkombëtare për të drejtat e njeriut./lajmi.net/
Like this:
Like Loading...
