Deputetët e partisë Nisma për Kosovën kanë ndërmarr iniciativën për mocion të mosbesimit ndaj Qeverisë së Kosovës, por opozitës fillimisht i duhen 40 nënshkrime, në mënyrë që mocioni të procedohet në Kuvend.
Deputeti i Nismës për Kosovën, Enver Hoti në një prononcim për Telegrafin tha se është herët të flitet për rezultatin e mocionit.
Ndërkaq, njohësi i çështjeve juridike, Mazllum Baraliu, në një prononcim për Telegrafin ka komentuar mocionin e ngritur nga “Nisma për Kosovën” për rrëzimin e Qeverisë. Ai tha se kjo iniciativë rrezikon të dështoj.
Baraliu më tej sqaroi se opozitës fillimisht i duhen 40 nënshkrime, në mënyrë që mocioni të procedohet në Kuvend.
“Nëse dështon mocioni, atëherë duhet të pritet tre muaj që të bëhet mocioni i radhës. Vendi nuk mund të shkojë në zgjedhje më herët”, ka shtuar Baraliu.
Ndryshe, në nenin 100 të Kushtetutës së Republikës së Kosovës për mocionin e votëbesimit saktësisht thuhet:
- Mocioni i mosbesimit ndaj Qeverisë mund të ngrihet me propozimin e një të tretës (1/3) të të gjithë deputetëve të Kuvendit.
- Votëbesimin e Qeverisë mund ta kërkojë Kryeministri.
- Mocioni i mosbesimit vihet në rendin e ditës të Kuvendit, jo më vonë se pesë (5) ditë e as më herët se dy (2) ditë nga data e parashtrimit të tij.
- Konsiderohet se mocioni i mosbesimit është pranuar, nëse për të kanë votuar shumica e të gjithë deputetëve të Kuvendit të Kosovës.
- Nëse mocioni i mosbesimit dështon, mocioni tjetër i mosbesimit nuk mund të ringrihet gjatë nëntëdhjetë (90) ditëve të ardhshme.
- Nëse mocioni i mosbesimit votohet për Qeverinë në tërësi, Qeveria konsiderohet në Dorëheqje”. /Telegrafi/
