Njësia e Trafikut Rrugor në Mitrovicën e Jugut ka identifikuar një kundërvajtës gjatë kontrollit të trafikut në rrugën Skenderaj–Drenas, në fshatin Polac.
Sipas policisë, gjatë matjes me radar është konstatuar se shoferi po lëvizte me shpejtësi 137 km/h, në një zonë ku kufizimi i lejuar është 60 km/h.
Për këtë shkelje, ndaj tij është shqiptuar gjobë prej 300 euro, si dhe masa mbrojtëse – ndalim i drejtimit të mjetit motorik për tre muaj në të gjithë territorin e Kosovës.
Policia e Kosovës u ka bërë thirrje të gjithë pjesëmarrësve në trafik që të respektojnë kufizimet e shpejtësisë dhe rregullat e komunikacionit, me qëllim rritjen e sigurisë dhe parandalimin e aksidenteve. /Lajmi.net/
