Ministri maqedonas i Drejtësisë Bilen Saliji ka dhënë dorëheqjen pas vdekjes së një 4 vjeçari shqiptar vitin e kaluar.
Vendimi i Prokurorisë për të rikualifikuar akuzën në rastin e aksidentit, ka sjellë dhe dorëheqjen e Salijit. Nëpërmjet një deklarate për shtyp, ai shprehet se vendimin për dorëheqjen nuk e ka marrë nga presioni, por e quan një akt ndërgjegjësimi.
“Një ndër arsyet kryesore për përfshirjen time në politikë dhe sidomos si ministër Drejtësie ishte besimi im se drejtësia ishte shtylla kryesore e një shteti dhe ajo që është më e rëndësishme, drejtësi e barabartë për të gjithë qytetarët”- u shpreh ministri i Drejtësisë.
4 vjeçari Almir Aliu ishte viktimë e një zënke banale në Kumanovë. Pas zënkës, një maqedonas i është vërsulur me makinën e tij familjes shqiptare në tentim për ti shtypur. Nga sulmi, prindërit ngelën të lënduar, ndërsa fëmija 4 vjeçar u dërgua në klinikën e Shkupit, pasi u gjet në rrezik për jetë.
