Media amerikane: Trump i kërkoi Netanyahut që të tërheqë trupat nga Siria dhe Libani
Presidenti i SHBA, Donald Trump i kërkoi kryeministrit izraelit Benjamin Netanyahu që të largojë trupat izraelite nga Siria dhe Libani, sipas medias amerikane Axios, e cila citoi zyrtarë amerikanë dhe izraelitë.
Tre muaj para zgjedhjeve që konsiderohen vendimtare si për mbijetesën e tij politike ashtu edhe për lirinë e tij personale, Netanyahu vështirë se do të vazhdojë me një tërheqje të konsiderueshme të forcave izraelite nga territoret që vendi i tij kontrollon në Siri ose do të miratojë vendosje të mëtejshme në Liban, përtej asaj që ai tashmë ka pranuar, vlerëson Axios.
Megjithatë, ndërhyrjet e Trump po rrisin presionin mbi kryeministrin izraelit. Forcat e Armatosura Izraelite (IDF) ende kontrollojnë zona të mëdha të Libanit jugor dhe Sirisë jugore, një prani që qeveria izraelite e konsideron të nevojshme për të parandaluar një sulm tjetër të ngjashëm me atë të 7 tetorit.
Zyrtarë të lartë të qeverisë izraelite janë në favor të ruajtjes së kontrollit mbi këto zona për një kohë të pacaktuar, ndërsa disa madje mbështesin krijimin e vendbanimeve hebraike.
Një zyrtar amerikan tha se Trump i vuri në dukje Netanyahut se prania e ushtrisë izraelite në territorin sirian po shkakton tensione dhe mund të çojë në përshkallëzim të mëtejshëm.
Lexo edheMoti për sot
“Ata nuk ju duan atje. Duhet të rivendosni forcat tuaja ”, thuhet se i tha Trump Netanyahut, sipas të njëjtit zyrtar, i cili shtoi se një mesazh i ngjashëm u përcoll edhe për Libanin.
Nga ana e saj, zyra e Kryeministrit izraelit tha në një deklaratë se “Kryeministri theksoi nevojën për të ruajtur zonat e sigurisë përgjatë kufijve të Izraelit”.
