Komisioni Qendror i Zgjedhjeve (KQZ) ka publikuar rezultatet e reja të numërimit të votave për kandidatët për deputetë, ku tashmë janë numëruar mbi 8% e votave në nivel vendi.
Sipas të dhënave të fundit, në Partinë Demokratike të Kosovës (PDK) vazhdon të kryesojë Bedri Hamza me 8,433 vota. Pas tij renditen Përparim Gruda me 5,272 vota, Arian Tahiri me 4,730 vota dhe Uran Ismaili me 4,090 vota, shkruan lajmi.net.
Në pesëshen e parë mbetet edhe Vlora Çitaku, e cila ka grumbulluar 2,805 vota, po aq sa Sala Jashari, e renditur në vendin e gjashtë.
Rezultatet e fundit kanë sjellë lëvizje edhe në dhjetëshen e parë të kandidatëve. Arben Mustafa është ngjitur në vendin e tetë me 2,115 vota, ndërsa Ganimete Musliu ka hyrë në top 10 me 2,081 vota.
Në dhjetëshen e parë të PDK-së renditen gjithashtu Elmi Reçica me 2,355 vota dhe Kosovare Murseli me 2,113 vota.
Procesi i numërimit të votave për kandidatët për deputetë po vazhdon, ndërsa pritet që renditja të ndryshojë me publikimin e rezultateve të reja nga KQZ-ja. /Lajmi.net/
