Mbi 20 për qind e popullatës së Skenderajt jeton nga ndihmat sociale dhe nga pensionet, ndërsa 5 mijë persona kërkojnë punë. Duke u bazuar në raportin e Institutit Kombëtar për Kërkim dhe për Zhvillim të Politikave (KIPRED), 11,2 për qind e qytetarëve të kësaj komune jetojnë nga ndihmat sociale dhe 9,4 për qind nga pensionet, shkruan gazeta “Zëri”.
Pothuajse secili kandidat për kryetar të Skenderajt për këto 20 vjet në liri gjatë fushatave zgjedhore, duke u nisur nga Ramadan Gashi, pastaj Sami Lushtaku e deri te ky i fundit Bekim Jashari, me qëllimin e vetëm për të marrë besimin e qytetarëve të varfër të Skenderajt dhe për vota, janë zotuar se punën e parë që do ta bëjnë do ta punësojnë nga një anëtar të familjeve, të cilat nuk kanë të punësuar dhe që jetojnë në varfëri.
Asnjëri prej tyre nuk e ka mbajtur premtimin e dhënë, derisa varfëria jo vetëm që nuk është zbutur, por ajo është shtuar çdo ditë e më shumë. Pothuajse të gjitha qeverisjet komunale në këto 20 vjetët e fundit janë kënaqur me ndihmat humanitare të shoqatave të ndryshme dhe në raportet e tyre të gjithë ndihmat që kanë ardhur nga këto organizata për njerëzit në nevojë i kanë treguar si rezultate të punës së tyre. Aktualisht mbi 20 për qind e popullatës së komunës së Skenderajt jeton nga ndihmat sociale dhe nga pensionet.
