Apetit Group për rastin e mishit të bllokuar në Mal të Zi: Asnjë kilogram nuk ka hyrë në treg

Pas raportimeve për bllokimin e ngarkesave me mish viçi të skaduar nga Brazili në Mal të Zi, kompania Apetit Group ka reaguar duke mohuar se ndonjë pjesë e këtyre ngarkesave ka hyrë në tregun e Kosovës apo të vendeve të tjera ku operon.

Në sqarimin e saj, kompania thotë se ngarkesat e ndaluara nga autoritetet malazeze nuk kanë hyrë në procedurë importi në Kosovë, Mal të Zi, Maqedoni të Veriut, Shqipëri apo Bosnje e Hercegovinë.

Sipas Apetit Group, asnjë kilogram i këtij malli nuk është importuar, zhdoganuar apo hedhur në treg në këto vende, transmeton lajmi.net.

Kompania ka theksuar gjithashtu se produktet e përmendura nuk janë futur në rrjetin e saj të shitjes dhe nuk u janë shpërndarë konsumatorëve.

“Ngarkesat nuk janë futur në tregun e vendeve ku kompania operon dhe nuk janë shitur apo shpërndarë te konsumatorët”, thuhet në sqarimin e kompanisë.

Reagimi i Apetit Group vjen pasi autoritetet e Malit të Zi bllokuan gjithsej rreth 102 tonë mish viçi nga Brazili, të cilat, sipas autoriteteve malazeze, kishin destinacion Kosovën.