Ministri në detyrë i Arsimit dhe Shkencës, Hajrulla Çeku, ka marrë vendimin për shpalljen e thirrjes publike për ndarjen e bursave për studentet vajza dhe gra të regjistruara për herë të parë në vitin akademik 2025/2026 në programet e Shkencës, Teknologjisë, Inxhinierisë dhe Matematikës (STEM) në institucionet publike të arsimit të lartë në Kosovë.
Sipas njoftimit të Ministrisë së Arsimit dhe Shkencës, thirrja publike do të hapet të hënën, më 8 qershor.
Të gjitha informatat lidhur me kushtet e aplikimit, dokumentacionin e nevojshëm dhe afatet për aplikim do të publikohen në shpalljen e konkursit.
Kjo nismë synon të mbështesë dhe inkurajojë pjesëmarrjen e vajzave dhe grave në fushat STEM, të cilat konsiderohen kyçe për zhvillimin e inovacionit, teknologjisë dhe tregut të punës në vend.
Ministria e Arsimit dhe Shkencës u ka bërë thirrje të gjitha studenteve që plotësojnë kriteret të aplikojnë brenda afateve të përcaktuara në konkursin që do të publikohet më 8 qershor.
