Kryetari i Degës së Partisë Demokratike të Kosovës në Skenderaj, Sami Lushtaku është tallur me nënkryetarin e shkarkuar të PDK-së në Skenderaj, Bekim Haxhiun.
Pas vendimit të Kryesisë së PDK-së në Skenderaj për shkarkimin e Bekim Haxhiut, të njohur me nofkën “Kamishi”, Sami Lushtaku deklaroi se vendimin për kthimin e tij në degën e PDK-së në Skenderaj mund të vendos vetëm ai.
Teksa fliste për shkarkimin e Haxhiut, në një intervistë për Insajderin, Sami Lushtaku është tallur me ish-deputetin e Kuvendit të Kosovës.
Bekim Haxhiu është i njohur për lidhjet e tij me qytetin e Mitrovicës. Ai bën shpeshherë fushatë në këtë komunë dhe më parë kishte qenë pjesë e strukturave të Klubit të Futbollit Trepça. Për këtë, Lushtaku është tallur me Haxhiun.
“Ai është edhe i Skenderajt, edhe i Mitrovicës edhe… qysh t’i vyej. Nganjëherë është edhe i Fushë Kosovës. Qysh t’i vyej”, deklaroi Lushtaku për Insajderin.
Bekim Haxhiu, ndërkaq, i është kundërpërgjigjur Lushtakut pas shkarkimit nga pozita e nënkryetarit të degës. Ai ka thënë se Lushtaku nuk mund ta përjashtojë nga partia, por sipas tij, vetëm kryetari i PDK-së Kadri Veseli mund ta bëjë këtë. /Insajderi.com
