Lushaku-Sadriu: Propozimi për nënkryetar i takon ekskluzivisht partisë – jemi në një periudhë shumë të rëndësishme historike dhe institucionet duhet të bëhen funksionale

Deputetja e Lidhjes Demokratike të Kosovës, Jehona Lushaku-Sadriu, ka deklaruar se LDK-ja nuk ka ndërhyrë në vullnetin individual të deputetëve për të votuar ose jo kandidatët e propozuar për nënkryetarë të Kuvendit nga partitë opozitare.

Ajo ka theksuar se, sipas qëndrimit të LDK-së, e drejta për të propozuar kandidatin për nënkryetar i takon partisë politike përkatëse, duke thënë se ky parim duhet të vlejë njësoj për të gjitha subjektet parlamentare, transmeton lajmi.net.

“Në emër të LDK-së ne nuk e kontestuam vullnetin e asnjë deputeti të Kuvendit të Kosovës, për të përkrahur apo mos të përkrahur një nënkryetar nga partitë opozitare. Por gjithsesi besojmë thellë se propozimi ynë për nënkryetar i takon ekskluzivisht partisë”, u shpreh ajo.

Lushaku-Sadriu bëri të ditur se LDK-ja ka marrë vendim që gjatë votimit individual të mbështesë kandidatët e propozuar nga grupet parlamentare, përderisa ata nuk kanë probleme ligjore.

“Ne në votimin individual për secilin nënkryetar, morëm vendim që t’i përkrahim propozimet e GP-ve, të cilët janë propozime të partive politike dhe nuk kanë problem me ligjin”, tha Lushaku.

Duke folur për vazhdimin e seancës konstituive, ajo tha se pret që pas konsultimeve deputetët të rikthehen në sallë dhe të vazhdojnë procesin e konstituimit të Kuvendit.