Lumir Abdixhiku do të vazhdojë të jetë në krye të Lidhjes Demokratike të Kosovës, pasi ka marrë mbështetjen e delegatëve në Kuvendin e Jashtëzakonshëm të partisë.
Sipas informacioneve të fundit, në votimin për shkarkimin e tij, 170 delegatë kanë votuar kundër shkarkimit të Abdixhikut, ndërsa 152 kanë votuar pro largimit të tij nga pozita e kryetarit të LDK-së, transmeton lajmi.net.
Kuvendi i Jashtëzakonshëm i LDK-së u mbajt me pjesëmarrjen e 325 delegatëve nga gjithsej 355 sa ka partia. Punimet u zhvilluan me dyer të mbyllura për media pas përfundimit të fjalimit të Abdixhikut.
Gjatë adresimit të tij para delegatëve, Abdixhiku kritikoi nismën për mbajtjen e këtij Kuvendi, duke e cilësuar të gabuar dhe të parakohshme. Ai tha se kjo ditë nuk duhej të ishte një përpjekje për rrëzimin e kryetarit, por një moment për të diskutuar të ardhmen e partisë.
