Shefi i Stafit të Kryeministrit në Zyrën e Kryeministrit të Republikës së Kosovës, Luan Dalipi, ka deklaruar pasurinë e tij pranë Agjencisë Kundër Korrupsionit, ku figurojnë pasuri të paluajtshme me vlerë mbi një milion euro, dy vetura, kursime bankare dhe të ardhura familjare nga disa burime.
Sipas deklarimit zyrtar, Dalipi mban këtë funksion zyrtar që nga prilli i vitit 2021, ndërsa pasuria e tij lidhet kryesisht me aktivitete të mëhershme biznesore dhe të ardhura familjare. Të dhënat e dorëzuara në Agjencinë Kundër Korrupsionit përfaqësojnë deklarim zyrtar të pasurisë dhe jo vlerësim të tregut.
Pjesa më e madhe e pasurisë së tij është e përqendruar në patundshmëri, e cila në total arrin vlerën prej një milion e gjashtëdhjetë e nëntë mijë e dyqind euro. Këtu përfshihet një shtëpi 360 metra katrorë me vlerë rreth 950 mijë euro, një banesë 112 metra katrorë me vlerë rreth 110 mijë euro, si dhe dy njësi më të vogla, një depo dhe një garazhë, me vlera përkatëse prej 6 mijë dhe 3 mijë e 200 euro, shkruan lajmi.net.
Në pasurinë e luajtshme ai ka deklaruar dy vetura, një Mercedes-Benz i vitit 2018 me vlerë rreth 35 mijë euro dhe një veturë tjetër e vitit 2019 me vlerë rreth 8 mijë e 500 euro, në pronësi të bashkëshortes.
Sa i përket gjendjes financiare, Dalipi dhe familja e tij kanë deklaruar rreth 46 mijë e 662 euro kursime në banka të ndryshme në Kosovë, përfshirë ProCredit Bank dhe Raiffeisen Bank.
Të ardhurat vjetore familjare, sipas deklarimit, arrijnë në rreth 46 mijë e 897 euro. Në këtë shumë përfshihen paga e tij në Kryeministri, meditjet dhe udhëtimet zyrtare, si dhe të ardhurat e bashkëshortes nga sektori shëndetësor dhe privat.
Në deklarim nuk figurojnë aksione, letra me vlerë, kriptovaluta apo detyrime financiare aktive.
Në përmbledhje, pasuria e deklaruar e Luan Dalipit, e përbërë kryesisht nga prona të paluajtshme dhe kursime, tejkalon vlerën prej 1.1 milion euro, ndërsa të ardhurat vjetore familjare arrijnë rreth 47 mijë euro. /Lajmi.net/
