Kombëtarja A e Kosovës, sot ka zhvilluar stërvitjen e parë në stadiumin e porsarinovuar “Fadil Vokrri” në Prishtinë, derisa më herët kanë vizituar edhe varrin e Fadil Vokrrit në Dragodan
Sipas FFK’së, ekipi ka qenë shumë i emocionuar gjatë kësaj vizitre derisa në orët e pasdites është mbajtur një stërvitje me intensitet të lartë, ku është fokusuar në mbrojtje dhe në kundërzbritje.
Në fakt edhe gjatë konferencës për shtyp të Challandes, ai tha se do të punojë më shumë në mbrojtje, për të rritur nivelin e Kosovës në të gjitha repartet.
Pas stërvitjeve në Fadil Vokrri, kapiteni i Kosovës, Samir Ujkani tha se për të ishte një kënaqësi që stërvitën në stadiumin e Kosovës, me në fund.
“Është kënaqësi të stërvitësh në stadiumin ‘Fadil Vokrri’, ndërsa po e ndjejmë madhështinë e tij këtu që aq shumë dëshironte që të luanim këtu. E vështirë pa të, por ne do të luajmë e do të angazhohemi maksimalisht për të dhe për gjithë Kosovën. Atmosfera në mesin tonë është mjaft e mirë dhe ne besojmë shumë që do të kemi rezultate të favorshme”, ka thënë Ujkani.
Edhe për Arbër Zenelit, të luash në shtëpi është një ndjenjë shumë e mirë.
“Patëm stërvitjen e parë e cila kaloi mjaft mirë. Po koordinohemi gjithnjë e më shumë dhe më mirë. Do të punojmë me intensitet më lartë gjatë këtyre ditëve në mënyrë që të jemi plotësisht të gatshëm për ndeshjen me Azerbajxhanin”, tha Zeneli.
Kurse Benard Berisha, tha se për të dhe Kosovën është me rëndësi se po luajnë në një stadium që mban emrin e legjendës, Fadil Vokrri.
“Më në fund jemi në shtëpinë tonë, në stadiumin që e mbanë emrin e legjendës “Fadil Vokrri”, që ai e dëshironte shumë këtë stadium. Në stërvitjen e parë punuam mirë dhe do të koordinojmë bashkëveprimet tona dhe unë besojë se të gjithë ne duam që të shënojmë rezultate të mira”. /GazetaExpress/
