Kreu i AAK-së, Ramush Haradinaj, ka insistuar ditët e fundit se ai duhet të zgjidhet president i vendit pas përfundimit të mandatit vitit e ardhshëm të Hashim Thaçit në të kundërtën ka paralajmëruar LDK-në se tërhiqet koalicioni dhe vendi shkon në zgjedhje të reja.
Haradinaj dëshirën për t’u bërë president e ka arsyetuar me atë se partia e tij do të humbte fuqinë nëse PDK-ja e Kadri Veselit futet në koalicion.
Por kreu i NISMA-s, Fatmir Limaj, pas takimit të liderëve të koalicionit ka bërë të ditur se kjo temë s’është diskutuar fare në takimin e sotëm, për më tepër ka goditur Haradinajn, duke thënë se është e turpshme të diskutohet kjo temë tani, shkruan Reporteri.net.
“Kosova e ka presidentin, qëndrimi zyrtar i Nismës dhe nuk është temë e diskutimit, tash me u diskutu kjo temë është e turpshme. Duhet të takohemi me partnerët që t’i shtrojmë shqetësimet që i kemi”, ka deklaruar Limaj.
Megjithatë nuk duhet harruar se po sot, zyrtarë të caktuar të NISMA-s dolën me propozim që pikërisht Limaj të jetë president i vendit. /Reporteri.net/.
