Autoritetet e Kosovës tashmë kanë thënë se do ta rrëzojnë murin në Veri, por Zyra e BE-së si duket nuk është e kënaqur me këtë. Gjatë një takimi të shefes së BE-së në Kosovë Natalyia Apostolova me Ministrin Shala, zyrtarja evropiane ka thënë se zgjidhja për murin në Veri duhet të funksionojë për të gjithë.
“Ambasadorja Apostolova e theksoi nevojën për gjetjen e një zgjidhjeje për murin në Veri të Mitrovicës, që do të ishte funksionale për të gjithë” thuhet në njoftimin e Zyrës së BE-së në Kosovë.
Më poshtë mund ta lexoni të plotë komunikatën e Zyrës së BE-së në Kosovë:
Zbatimi i ndihmës së BE-së, zhvillimet relevante në veri dhe puna e ardhshme e Këshillit Mbikëqyrës dhe Zbatues ishin temat e takimit mes Shefes së Zyrës së BE-së në Kosovë, Nataliya Apostolova dhe Ministrit të Mjedisit dhe Planifikimit Hapësinor të Kosovës, Ferat Shala. Ambasadorja Apostolova e theksoi nevojën për gjetjen e një zgjidhjeje për murin në Veri të Mitrovicës, që do të ishte funksionale për të gjithë. Ministri Shala njoftoi për emërimin e një Sekretari për Këshillin Mbikëqyrës dhe Zbatues në ditët në vazhdim. Të dy palët theksuan kontributin e BE-së në zhvillimin e Kosovës përmes ndihmës së IPA-së.
