Pas gati dy vjet miratimi, të mërkurën, Kuvendi i Kosovës do të nisë të monitorojë ligjin për Digjitalizimin e Transmetimeve Radiodifuzive Tokësore.
Raif Qela tha se pavarësisht që ligji ka hyrë në fuqi vite më parë, nuk është monitoruar edhe për shkak të kostos financiare, e cila i ka krijuar probleme.
Kuvendi do të mbështesë digjitalizimin e Televizionit Publik, por do t’u ofrojë ndihmë edhe familjeve në nevojë, duke iu ofruar pajisje falas për televizionet e tyre të vjetra. Sidoqoftë, shtetet e rajonit kanë përfituar nga BE-ja dhe kreu i Komisionit Parlamentar për Digjitalizimin tha se nëse qeveria nuk do të aplikojë për këto fonde, mund ta bëjnë vetë si komision.
Megjithatë, Qeveria e Kosovës ende nuk e ka miratuar strategjinë për digjitalizimin, pavarësisht që kishte premtuar edhe mbështetje financiare.
Kreu i KPM-së, Adnan Merovci, thotë se kjo nuk paraqet problem, pasi procesi është komercializuar.
Gjithsesi, derisa të rregullohet çështja e frekuencave, nuk do të ndërpritet sistemi analog i transmetimit.
Kohavisioni dhe Radio Televizioni 21 paraprakisht kanë testuar sistemin digjital, por nga e marta në ora 7 të mëngjesit, KTV-ja ka ndërprerë këtë sinjal, duke ndjekur rregullat e KPM-së. Një gjë të tillë e ka bërë javën e kaluar edhe RTV21.
