Kandidati për kryeministër nga radhët e Vetëvendosjes, Albin Kurti, ka reaguar pas rrahjes së të birit të diplomatit serb në Kosovë, Nenad Rashiq.
Kurti ka thënë se sulmi është i organizuar dhe motivet kanë të bëjnë me babin e tij. Ai ka kërkuar nga organet e rendit që ta zbardhin rastin sa më shpejt.
Ai këto deklarime i ka bërë me anë të ‘Facebook’-ut, teksa ka dhënë edhe një premtim për qeverinë e tij.
Postimi i plotë:
Me keqardhje të madhe morëm lajmin se sot në Graçanicë, djaloshi 18 vjeçar, Nikolla Rashiq, u rrah brutalisht me armë të ftohta. Nikolla është i biri i Nenad Rashiqit, politikanit demokrat e të mirënjohur serb në Kosovë.
Duket se ky krim banditesk ndaj Nikolla Rashiqit është i organizuar dhe ka të bëjë me prindin e tij që nuk u thye e as s’u nënshtrua ndaj trysnisë e kërcënimeve të Serbisë. Me gjasë, meqë nuk e frikësuan dot Nenad Rashiqin, ia rrahën të birin Nikollën.
Në qeverinë tonë të re do të punojmë që të gjithë qytetarët e Kosovës pa dallim përkatësie kombëtare të jetojnë të sigurtë.
Kërkoj që organet e rendit urgjentisht ta zbardhin këtë rast dhe kriminelët të përgjigjen para drejtësisë, ndërkaq Nikollës i uroj shërim të plotë e të shpejtë. /Gazeta Express/
