Mëngjesin e sotëm, Valbona Sako njoftoi largimin nga posti i kryebashkiakes së Durrësit. Nëpërmjet një reagimi në rrjetet sociale, Sako jep edhe arsyet që e kanë detyruar të marrë këtë vendim.
Sipas Sakos, ishte e pamundur menaxhimi i stresit nga reagimi i madh negativ ndaj një prononcimi që ajo bëri.
Mbrëmë, teksa ishte në një lidhje live me gazetaren e Top Channel, kryebashkiakja tha se jemi të kënaqur edhe me 50 viktima.
“E lënduar nga reagimi i madh negativ ndaj një prononcimi që bëra, nën një stres që i kalon fuqitë e mia, jap dorëheqjen nga detyra e Kryetares së Bashkisë Durrës.
Falenderoj nga zemra të gjithë ata që më besuan dhe shpresoj në mirëkuptimin e të gjithëve”, shkroi Sako.
Por, cilat janë arsyet e vërteta që detyruan kryebashkiaken e sapozgjedhur që të lërë postin?
Betonizimi i Durrësit dhe infrastruktura e dobët kanë qenë gjithmonë pjesë e debate të shumta politike dhe mediatike. Ish-kryebashkiaku Vangjush Dako është sulmuar për ndërtimet pa kriter dhe jo cilësore në qytetin bregdetar, dhe e gjithë kjo përgjegjësi pas kësaj katastrofe bie mbi Sakon.
Pas tërmetit, Durrësi u përfshi në një situatë kaotike dhe lufte për mbijetese. E papërgatitur për një gjendje të tillë emergjence, kryebashkiakja Sako u akuzua se nuk menaxhoi si duhet situatën në qytet. Njerëzit mbetën në rrugë, pa ushqim dhe të traumatizuar, duke rënduar edhe më shumë gjendjen e tyre fizike dhe psikologjike.
Veç kësaj, Sako ka qenë gjithmonë e sulmuar nga të vetët, ku nuk kanë munguar konfliktet e brendshme mes saj dhe deputetëve socialistë. Mungesa e mbështetjes nga PS në këtë situatë të vështirë për të dhe qytetin që ajo drejton, ka nxitur edhe më tej kryebashkiaken që të lërë postin.
Pas tërmetit apokaliptik, Durrësi pothuajse është shkatërruar plotësisht. Rindërtimi i qytetit bregdetar duket një mision i pamundur në gjithë këtë situatë dhe ndoshta kjo e ka trembur disi Sakon.
Ndërsa, mbrëmjen e djeshme, ”Gazeta Shqip” publikoi një video, ku gjatë një interviste ‘Live’ në Top Channel, Valbano Sako bëri një gafë të hidhur. Për mikrofonin e Top Channel, ajo deklaroi se ishte e kënaqur me vetëm 50 viktima, se mund të kishte edhe më tepër.
