E përditshmja austriake “Standard” ka kërkuar qëndrimin e pesë shteteve evropiane që nuk e kanë njohur Kosovën në lidhje me një zgjidhje mes Prishtinës dhe Beogradit.
Shtete evropiane që nuk e kanë njohur pavarësinë e Kosovës janë të mendimit se zgjidhja e çështjeve të Kosovës duhet të arrihet nën mbikëqyrjen e Bashkimit Evropian, shkruan e përditshmja austriake “Standard”.
Po ashtu, ajo ka publikuar qëndrimet e Ministrive të Punëve të Jashtme të pesë shteteve evropiane që nuk e kanë njohur ende Kosovën si shtet.
“Tema si shkëmbimi i territoreve, banorëve ose ide të ngjashme, që i takojnë historisë së kaluar të atjeshme, duhet të jenë të mbyllura”, thonë nga Ministria e Punëve të Jashtme e Rumanisë, përcjell lajmi.net.
Ata po ashtu mbështesin gjetjen e zgjidhjes nëpërmjet ndërmjetësimit të Bashkimit Evropian.
“Për këtë nevojitet një dëshirë solide politike, shmangia e vendimeve të shpejta, krijimi i shoqërive me vlera multietknike në Evropë”, shton ministria.
Ajo po ashtu ka bërë thirrje për shmangien e precedentëve të rrezikshëm, përcjell lajmi.net.
Ministria e Punëve të Jashtme e Sllovakisë ka theksuar se është e rëndësishme të ndryshohen marrëveshjet e deritashme mes Beogradit dhe Prishtinës. Andaj, ajo propozon arritjen e një marrëveshjeje që mundëson stabilitet në rajon.
Ministria e Punëve të Jashtme e Qipros ka shtuar se nuk shohin kuptim të komentojnë skenare hipotetike, ngjashëm sikurse Ministria e Spanjës që beson se është herët t’i analizojë rezultatet që nuk janë arritur./Lajmi.net/
