Konjufca paralajmëron: Albulena Haxhiu mbetet kandidate për kryetare të Kuvendit

Ministri në detyrë i Punëve të Jashtme të Kosovës, Glauk Konjufca ka deklaruar se Albulena Haxhiu pritet të jetë sërish kandidatja e Lëvizjes Vetëvendosje për kryetare të Kuvendit të Kosovës.

Konjufca deklaroi se megjithëse çështja ende nuk është diskutuar në parti, në mbledhjen e ardhshme të Kryesisë pritet të merret vendimi zyrtar.

“Unë mendoj që kryetaren e Kuvendit tashmë e kemi vendosur, ajo është zonja Haxhiu. Dhe ma merr mendja që do jetë propozimi i njëjtë”- tha Konjufca para mediave.

Konjufca foli edhe për takimin e kryeministrit në detyrë, Albin Kurti, me partitë opozitare, duke vlerësuar se LDK ka treguar më shumë gatishmëri për të tejkaluar ngërçin politik, ndërsa PDK ka mbetur në qëndrimet e saj të mëparshme. Sipas tij, mundësitë për një marrëveshje varen nga vullneti i partive për bashkëpunim.

“PDK më shumë qëndron në pozicione të cilat i kemi parë më moti, ato janë pozicione të vjetra që i kemi parë dhe u shprehën edhe në takim me Kryeministrin Kurti. Sa i përket LDK-së përshtypja jonë është që përkundër herave të kaluara, kësaj here ka vullnet më të madh për ta tejkaluar këtë moment në të cilin ndodhet Kosovë”- tha Konjufca.

Ai u shpreh se opsionet që dalin në tavolinë për marrëveshje, janë në përpjestim me vullnetin dhe sa më shumë ka gatishmëri për bashkëpunim rriten edhe opsionet për zgjidhje.