Kolesteroli i lartë shpesh lidhet me mbipeshën, por ekspertët theksojnë se kjo është vetëm pjesërisht e vërtetë. Faktorët gjenetikë luajnë rolin kryesor në nivelet e kolesterolit në gjak.
Kolesteroli është një substancë yndyrore që prodhohet kryesisht nga mëlçia dhe është e nevojshme për ndërtimin e qelizave dhe prodhimin e hormoneve. Megjithatë, nivelet e larta të kolesterolit LDL (i njohur si “kolesteroli i keq”) rrisin rrezikun për infarkt dhe goditje në tru, pasi grumbullohet në muret e arterieve dhe pengon qarkullimin e gjakut.
Sipas Naveed Sattar nga University of Glasgow, gjenetika është faktori kryesor që ndikon në rritjen e LDL-së. Dieta ka ndikim, por më pak sesa mendohet zakonisht, dhe ajo që ka më shumë rëndësi është sasia e yndyrave të ngopura, të pranishme në ushqime si ëmbëlsirat, çokollata dhe produktet e përpunuara.
Kjo do të thotë se edhe personat me peshë normale mund të kenë kolesterol të lartë, qoftë për shkak të trashëgimisë, qoftë për shkak të mënyrës së ushqyerjes.
Nga ana tjetër, mbipesha ndikon më shumë në lloje të tjera yndyrnash në gjak, si trigliceridet, të cilat gjithashtu rrisin rrezikun për sëmundje kardiovaskulare. Ajo lidhet gjithashtu me probleme si diabeti i tipit 2 dhe tensioni i lartë, që mund ta përkeqësojnë ndikimin e kolesterolit në organizëm.
Ekspertët rekomandojnë që pas moshës 40 vjeç të kryhen kontrolle të rregullta për kolesterolin, pasi vlerësimi i rrezikut nuk bazohet vetëm te LDL, por edhe te faktorë të tjerë si pesha, diabeti dhe presioni i gjakut.
Gjithashtu, këshillohet që të merret parasysh historia familjare e sëmundjeve të zemrës, pasi kjo mund të jetë një tregues i rëndësishëm për rrezikun individual. /GazetaExpress/
