Nuk ka shumë pamje të detajuara të akullnajës Thwaites, sepse në afërsi të këtij gjiganti akulli me dimensionet e Britanisë së Madhe nuk kanë mbërritur më shumë se 50 persona, në tërë historinë.
Por kjo pjesë e izoluar e Antarktidës së shpejti do popullohet nga qindra shkencëtarë që do ta studiojnë në çdo detaj, sepse nga përllogaritjet e tyre, në qoftë se planeti rrezikohet nga një kataklizëm, ai nuk vjen nga meteoritët ose vullkanet, por pikërisht nga Thwaites.
Akullnaja ka filluar të shkrijë qysh nga vitet ’90, por dy dekadat e fundit ritmi është dyfishuar, duke shndërruar 35 miliardë tonelata akull në ujë çdo vit.
Po të shkrihet i tëri, niveli i detit do të rritej me 65 centimetra, duke krijuar probleme të mëdha në çdo qytet bregdetar.
Por lajmet e këqija nuk mbarojnë këtu. me shkrirjen e Thwaites do të krijohej një efekt domino me akullnaja të tjera të Anktartidës, që potencialisht do të ngrinte nivelin e detit me më shumë se 3 metra në 200 vjet, duke shkatërruar në këtë mënyrë pjesën më të madhe të civilizimit./A2CNN
