Java vendimtare – deputetët “sy e vesh” nga Kushtetuesja
Të premten, më 8 gusht, merr fund masa e përkohshme e vënë nga Gjykata Kushtetuese, me të cilën u është ndaluar deputetëve çfarëdo vendimi apo veprimi për konstituimin e Kuvendit.
Në këtë gjykatë nuk iu përgjigjen pyetjeve të KOHËS në lidhje me shqyrtimin e tri lëndëve të dërguara nga PDK-ja, LDK-ja e presidentja Vjosa Osmani.
E, analisti Arbnor Sadiku pret që skenari i marrjes së mandateve të deputetëve të jetë më i përafërti.
Ai thotë se gjykata nuk duhet ta përsërisë gabimin e bërë me aktgjykimin e parë të sajin, të nxjerrë në fund të qershorit, kur nuk i listoi pasojat që prodhohen në rastin kur brenda afatit 30-ditor nuk konstituohet Kuvendi.
“Një përgjegjësi është më e madhe kësaj radhe e Gjykatës Kushtetuese, për shkak se herën e kaluar me vendimet e saj ka lënë shumë paqartësi dhe natyrisht jo vetëm që nuk e zgjodhën problemin, por krijuan edhe probleme shtesë. Kam përshtypjen që kësaj radhe Gjykata Kushtetuese është munduar që të jetë pak më e shpejtë dhe më e saktë”, ka thënë Sadiku.
Deputetët dështuan për 54 herë me radhë që ta përmbyllin seancën konstituive të Kuvendit. Punë nuk kreu as obligimi i vënë nga Kushtetuesja që konstituimi i legjislaturës së nëntë të kryhet brenda 30 ditësh e as organizimi i dy vazhdimeve të seancës në ditën e fundit të afatit.
Në rast të shpërndarjes së legjislaturës së nëntë, Sadiku konsideron se zgjedhjet e jashtëzakonshme parlamentare mund të mbahen edhe para atyre lokale, të caktuara për në tetor.
Lexo edhe“Nga dyshimet për tradhëti tek burgu” – rrëfimi i Sevdin Lajqit për problemet me gruan që e çuan prapa grilave
“Nëse Gjykata ua merr mandatin gjithë deputetëve dhe në të njëjtën kohë ia jep mundësinë presidentes që ta çojë vendin në zgjedhjet e jashtëzakonshme, i bie që zgjedhjet e reja duhet të mbahen në shtator brenda 45 dite dhe i bie që nuk do të mbahen në të njëjtën datë, por në rast se shtyhet ky proces dhe u jepet prapë mundësia partive politike që ta bllokojnë situatën përmes kuvendit, gjasat janë shumë të mëdha që të shkohet në të njëjtën kohë”, ka thënë Sadiku.
Masa e përkohshme dyjavore e vënë nga Kushtetuesja, ka hyrë në fuqi më 27 korrik, një ditë pasi përfundoi 30-ditëshi i përcaktuar nga ajo si afati i fundit për konstituimin e Kuvendit.
Seanca për konstituimin e Kuvendit nisi më 15 prill. Bllokada është shkaktuar te pika e tretë e rendit të ditës – zgjedhja e kryetarit.
Në vazhdimet e para, Lëvizja Vetëvendosje si fituese e zgjedhjeve, e propozoi Albulena Haxhiun për kryeparlamentare, por ajo nuk i mori votat e mjaftueshme në disa tentime.
Më pas LVV-ja, falë edhe kryesuesit të seancës Avni Dehari, që vjen nga kjo parti, tentoi ta ndryshonte formën e votimit – nga i hapur, në i fshehtë. Dhe për votim të fshehtë u tentua të krijohet një komision, që për gati 50 votime nuk i ka marrë votat e mjaftueshme. Opozita e deritashme e ka quajtur në vazhdimësi të kundërligjshëm këtë veprim të LVV-së.
