Albena Reshitaj, mbrëmë përmes një postimi në rrjetin social Facebook, njoftoi se ka dhënë dorëheqje nga posti i ministres së Mjedisit dhe Planifikimit Hapësinor.
Ajo dorëheqjen e ka arsyetuar duke thënë se një gjë të tillë e ka bërë për arsye personale, për çka e ka njoftuar edhe kryeministrin e Kosovës, Ramush Haradinaj.
Partia Aleanca Kosova e Re (AKR), e cila drejton dikasterin e MMPH-së, sot ka emëruar personin që për një kohë do të zëvendësojë Reshitajn.
Bëhet fjalë për Fatmir Matoshin, i cili e ka konfirmuar për Indeksonline se nga sot është ushtrues detyre i ministrit të Mjedisit dhe Planifikimit Hapësinor.
“Nuk është vendosur ende kush do të emërohet në pozitën e Reshitajt. Unë prej sot jam ushtrues detyre i ministrit, por vendim për emërim të ministrit të ri nuk është marrë akoma. Vendimi i takon presidentit Pacolli dhe strukturave të partisë së AKR-së, pasi unë jam edhe zëvendësministër këtu”, ka thënë Matoshi.
