Ish-i përndjekuri që çoi energji dhe internet në bjeshkë, kush ishte i moshuari që u vra sot

Ngjarja e rëndë ndodhi në fshatin Dobërdol.

Dy ditë më parë, Tahir Bajraktari udhëtoi nga Tirana në drejtim të vendlindjes së tij, por ky do të ishte udhëtimi i fundit i 69-vjeçari pasi do të qëllohej për vdekje brenda në shtëpinë e tij të pushimit nga Nik Lulashi, për arsye që policia i specifikon “motive të dobëta”. Shqiptarja.com shkruan se autori i krimit ishte i punësuar nga Bajraktari në shtëpinë e tij në Doberdol. Mes autorit dhe viktimës ka pasur një konflikt për çështjen e pagesës.

Banorët e zonës thonë se 69-vjeçari ishte njeri i qetë dhe pa probleme. Sipas tyre, ai çdo vit udhëtonte nga Tirana, ku edhe banonte, dhe kalonte pushimet në shtëpinë verore të ndërtuar në bjeshkë. Edhe këtë vit, Tahir Bajraktari, me profesion mekanik, do qëndronte për disa ditë në shtëpinë e rindërtuar, ku siç shprehen të afërmit energjinë elektrike kishte mundur ta siguronte vetë përmes një mini-çentrali të ndërtuar pranë fshatit dhe me të cilin furnizonte edhe fqinjët e tij. Gjithashtu, ai kishte arritur të siguronte edhe shërbimin e internetit në banesën e tij por edhe të fqinjëve.